تحب تشوف عرض ( البونك )

الحوار الي جي ده بيني وبين رزان في TV

وللي ميعرفش رزان دي مذيعة وممثلة وراقصة وعارضة ازياء والله اعلم بتعمل ايه تاني ومدارية عشان الحسد وبتقدم برناج اسمه لعبة الحياة .. طبعاً الأسم يحسسك انك مطلوب منك تعدي المانش ولا تتبلش .

أنا : معلش يا سيد بجد متعيطش عشان انا القولون بينأح عليا وعلي الي خلفوني يا ابني ؟

في التليفزيون : هاردلك يا سيد انت لعبت كويس وتستاهل كل خير يا ضنايا بس معلش انت الي قبلت عرض( البونك) محدش قالك توافق وتعمل ديل.

أنا : عندك حق يا رزان والله محدش قاله يبقي( ديل)

مرارتي ياماااااااااااا .. ايه الي بتتفرجي عليه ده هتجيبيلي شلل.

في التليفزيون : حنان كانت حاسه انك هتخسر وقالتلك بس انت مطلعتش عبقري وذكي جدا زي مكنت متخيله ازاي متقدرش تخمن كل علبة من علب حلاوة المولد دي فيها ايه ؟ الموضوع عادي جدا اي حد ذكي لازم يعرفه.

أنا : يا سلام ... الموضوع فعلا محتاج واحد ذكي الحمد لله ان الواحد مش ذكي علي كده.. لو ده مفهوم الذكاء .. عن اذنك يا ماما الريموت كده .. ايوه هاتي اي حاجة في الدنيا ماعادا البرنامج ده .. وبعدين نفسي افهم حاجة انا الحمد لله مستوايا في الانجليزي مش وحش وعمري ما سمعت موضوع ( البونك ) ده انا اعرف ان اسمه البنك.

يا جماعة بجد نفسي افهم

احنا بقينا تافهين اوي اوي ليه كده , لا وكمان تلاقي الناس معجبة بالبرنامج وبيتكلموا عنه : شفت الواد امبارح الي ما عرفش ايه الي في العلبة؟؟؟!!!

طب وايه الجديد مهو ده الاحتمال الوحيد الي ممكن تتكلموا عليه

وبعدين بجد هي الفرجة عليه ممتعه ولا انا الي بفيت أتم اوي يمكن ؟!

ورزان دي بقي كوم تاني خاااالص دي لا مذيعة ولا أعلامية ولا اي بتنجان كل ما في الأمر face فقط وعشان دمها يلطش كمان مش بقبل منظرها.

وبعدين يا جماعة ده أومار بجد مفيش فيه خلاف حتي .

وبعدين هو ليه كل أفكارنا يا اما سارقنها يا اما بتاعتنا فعلا وهايفة اوي كده ؟ خلاص مفيش فيه معدين بيعرفوا يفكروا ويبتكروا ولا الموضوع مشكلة منتجين هما الي شايفين السوق بيقول اديني في الهايف وانا احبك يا نننَس وفارضين رأيهم مثلاً.

ربنا يصبرنا .

هي دي ( القاهرة ) وهي دي( الناس) !؟

المبجل طارق نور صاحب أكبر شركة أعلانات في مصر أتحفنا في شهر رمضان الكريم بقناة القاهرة والناس والتي ليس لها اي علاقة لا بالقاهرة ولا بالناس .

نفسي أفهم قناه أسمها القاهرة والناس يبقي أغلب المذيعين فيها من لبنان وم الهند وم الجابون !!! ؟ ايه يا عم الحاج ؟

وياريتك جايب مذيعين عليهم العين , ده يا اما واحدة بتموت وفاكرة نفسها عندها 15 سنة يا اما واحد كل الي بيعمله انه مش بيدي حد فرصة يرد وفاكر نفسه ناصح ؟

كل دول مش مهم عندي دي قناة وان شا الله حتي يطلع فيها لابس طرطور ... هو حر

لكن هي القاهرة يا طارق باشا هي الأعلانات المبتذله بتاعة الرقص الي انت جبته؟

وهما دول الناس ! ؟ الي كلهم بيرقصوا وبس !؟

http://www.youtube.com/watch?v=BfVv_WdZwN0

حسبي الله ونعم الوكيل بجد

شوهة سمعتنا وسمعه مصر أكتر ما هي بايظة

بس مش منتظر من اي حد م الحزب الوطني اكتر من كده

يعني هتجيب معاناة الناس الي صورتهم بيرقصوا دول وهما واقفين في طابور العيش مثلاً !؟ طبعاً لا
ولا هما مطحونين في المواصلات ولا هما في طوابير المعاشات ولا اي زفت م الي هما فيه ؟
وخلاص القاهرة مفيش غيها حاجة نجيبها كويسة غير دول \
مفيش د/ أحمد زويل
ولا د / مصطفي محمود
ولا د / يوسف القرضاوي
ولا مليون واحد وواحدة أجدر بأسم القاهرة
عامة واضح ان كل أنسان بيعمل ما يدل علي شخصيته
وهذا ان دل فلا يدل غير عن انك راجل مهياااااص م الاخر
القاهرة الي فيها الازهر وفيها العلماء وفيها الناس من جميع انحاء الارض بيدرسوا في جامعتها لا يطلق أسمها علي قناتك التافهة
وأنا من رأيي تغير أسم القناة وبدل القاهرة والناس تسميها الداعرة والناس وأن شاالله حتي تيجي تقلع هدومك وتلبس طرطور أنت حر ساعتها.
وأنا لو مكان الناس الي اتصورت وأتذاه فيديوهاتها علني كده بدون ولا اذن ولا موافقة منهم ارفع عليك قضية ووديك في ستين داهية
بس يرفعوا ايه هما لاقيين ياكلوا عشان يرفعواقضايا .
حسبي الله ونعم الوكيل فيك بجد.

رسالة إلي الوالي

متسحرة الناس في بيوتهم ونايمين

وأنتم ف شوارع الهم متشردين

نفسي أشوفك يا ألي علينا آمين

يوم القيامة ونهايتك بلون الطين

شارع شبرا

6 صباحاً

11 رمضان

النشرة الفنية 2009

أزيكوا

مش هقعد اقول وحشتوني وجدا وأوي وأخر حاجة والشغل ده م الآخر


أنتم عارفين معزتكم عندي ومتخافوش عليها انا بأكلها كويس وهي بتسمع الكلام زيها زي أخواتها المعيز بالظبط.


نفسي أدخل مدونة كل واحد فيكوا وعلق علي كل التوبيكات بس غصب عني والله.


الذ حاجة أني دخلت أغلب الأفلام الموسم ده والي مدخلتوش شفته علي الكمبيوتر وقلت أنقل ليكم الصورة بعيني أنا وأنصحكم تشوفوا ايه ومتشوفوش ايه.

هبدا بإلي يتشاف طبعاً

أولاً الــفــرح

بجد يا جماعة من أكثر الأفلام الي عجبتني في السينما المصرية أساساً


بيناقش قضايا كلها مهمة مش نظام الهبل والتخلف المعتاد عندنا


هو بدأ بالمشكلة الأساسية في مجتمعنا وهي الفلوووووس وطبعا السيناريست أحمد عبد الله فوق الرااائع


وجاب كل مشكلة في الفيلم متفرعة منها


- الراقصة بترقص ليه في الفيلم.


- الزواج وتأخر الزواج وعمل ايه في الشباب والبنات , بجد ياسر جلال ممثل رائع في الدور ده وأول مره أشوف جومانا بتمثل أصلاً


والفيلم مفيش فيه اي مشاهد خالص حتي لو شفته الأعلان وحسيته أن فيه حاجة عايز أقلكوا إن الأعلان ما هو إلا أكل عيش عشان كله يدخل ودي مش مشكلة ممثلين ولا مخرجين ولا سيناريستات دي مشكلة منتجين طبعاً.


- مشكلة البنت الي في رقبتها أسرة كاملة ومش عارفه تبقي بنت زي باقي البنات.


- المخدرات.


- الضمير الي مات.


يعني كوكتيل جامد جدا , هو الفيلم حزايني شوية بس بجد رائع وهاادف بجد في أخره وأنصح أي حد يشوفه وهو مطمئن أن مفيش فيه مناظر خارجة ( يصلح للمشاهدة العائلية ).

الفيلم التاني في نشرتنا الفنية فيلم 1000 مبروك

طبعا لا غبار علي الفنان أحمد حلمي أنه أفضل كوميديان في مصر حالياً وده طبعاً مش رأيي الشخصي وبس لا دي إيراداته بتقول كده ده غير التطور الملحوظ الي مستواه فيه كممثل وكأفكار متنقية ع الفرازة بجد.


فيلم 1000 مبروك مش هحرقه بس هقول الهدق منه ايه وطبعا قبل اي حاجة أحمد حلمي مش بيعمل فيلم فيه مشاهد خارجة.


الهدف في الفيلم ده أنك متعش لنفسك بس لازم تعمل لنفسك ولغيرك أنت مش لوحدك في الدنيا طبعا ده بيدور في أطار كوميدي فوق الممتاز وسيناريو رائع وأخراج كويس أوي.

الفيلم الثالث هو فيلم بدل فاقد

برضه من الأفلام الكويسة والي فيها موضوع حلو ومشوق وبعض الغموض( المصري ) ولكنه كويس وأحمد عز عامل دور حلو أوي.

الفيلم الرابع يا جماعة هو فيلم طير أنت

أحمد مكي موهوب بالفطرة فعلاً ودنيا سمير غانم ممثلة مقبولة وطبعاً الفيلم للشباب فقط مش عشان فيه مشاهد لا ده عشان الفيلم مصطلحاته مش هيفهمها غير الشباب فقط لا غير ( طبعاً مش هقلو الشباب لحد سن كام عشان محدش يزعل )


وهدف الفيلم أنك متكونش حد تاني غيرك يعني متغيرش في أسلوبك وطريقتك وأهتماماتك عشان اي حاجة وطبعاً مش معناها أنك متتغيرش للأفضل ,المقصود أنك متغيرش من نفسك الطبيعية وتصتطنع حاجة تانية وأكيد أغلبنا سمع الأغنية بتاعة الفيلم وعرف أنها بجد هادفة جدا للشباب برضه.

الفيلم الخامس ..... دكان شحاتة

أولا هيفاء وهبي دي مينفعش تعمل اي حاجة في حياتها غير حاجة واحدة بس كلنا عارفينها كويس

عمرو سعد علي اده جدا من وجهة نظري أنا شايف الدور كبير عليه , طبعا المخرج خالد يوسف عشان هو ناصري لازم يفرض علي الي خلفونا فكرته طول الفيلم.

الفيلم فيه كتير من الخرافات الي مبقتش موجودة في مصر زي الأرهاب الي في صورة شوية جلاليب ولحي وخلاص وجنازير وطبعا المشاهد الزبالة بتاعة هيفاء وهبي معروفة وجت في الأعلان أغلبها وعلي فكرة مدفعتش فلوس في الفيلم ده انا اتعزمت علي العرض الخاص وكان يوم رزل جدا لان الفيلم تعبان ولكن

لازم يتشاف عشان تعرف بس احنا وصلنا فين في الأخراج والتصوير والتمثيل برضه.

أحلي ما في الفيلم بجد

أغنية مش باقي مني للفنان أحمد سعد بجد أغنية تجيب أكتئاب من وضع مصر لأنها كلمات حد جامد أوي الشاعر جمال بخيت.

ندخل بقي في الأفلام الي متتشفش

أولا طبعا فيلم أحكي يا شهرزاد

للأسف مني ذكي خرجت علينا بمشاهد عجيبة الشكل !!!


ما علينا من كل ده ولكن الفيلم لا يصلح ولا للمشاهدة العائلية ولا المشاهدة أساساً بدون ما نخوض في تفاصيل ملهاش قيمة


كل الموضوع في أختصار شديد هو أن الفيلم بيتكلم عن قهر المرأة وأستغلالها مع أن أنا أعرف مدونات واخدين حقهم في البلدي تاااااالت ومتلت :) علي فكرة أنا مدخلتش الفيلم أنا واحد حكاهولي كاااامل من الي دخلوه.

الفيلم الثاني هو أبراهيم الأبيض

كل الي أقدر أقوله أني بحب أحمد السقا جداً لأنه بيستغل كل أدواته في التمثيل بجد ومهاري فعلاً ولكن


ايه الهدف اني اقعد اتفرج علي واحد بيعور ويغز وينكت في الخلق ويتغز وخلاص حتي مجابوش تاب مثلاً في الأخر لا ده ولع في نفسه :) بصراحه حاجة جميلة وقدوة.


مش زي تيتو مثلاً واحد مات عشان عايز يبقي محترم وفضل ثابت علي موقفه وفي الأخر مات وده واقعي جداً.


عمرو واكد فوق الرائع ممثل عبقري بجد وعلي فكرة الوحيد الي جاله عرض يمثل بره في فيلم امريكي هو وطبعاً محمود عبد العزيز العمود الفقري للفيلم.

وأن شاء الله قريبأ باقي الأفلام

مفتقدكم جداً

والله وحشتوني أوي

بجد كنت مفتقد كل مدون ومدونة منكم ومفتقد تعليق ونقاش ومناكفة كل واحد فيكم :)

بس فعلاً التواصل ده حاجة رائعة,أنك تبقي علي أتصال بكااااااااام دماغ من مختلف الأعمار ومختلف مجالات العمل ومختلف الأهتمامات ومختلف الأديان أحياناً وأحياناً مختلف الجنسيات دي حاجة جميلة أوي.

تخيل لو بعد كل ده بقي تبقي كل علاقتك بالعالم الي حواليك هي

فواتير الضرائب والمحاسب القانوني وأجهزة الكمبيوتر الي مش بتقرأ ع الشبكة بتاعة الشركة

ياااااااااااااه تبقي حاسس أن الدنيا مفيش فيها خير وأنك معملتش في حياتك حاجة عدلة أصلاً وأنت مقحم دماغك في العمل بس

( جامدة أوي مقحم دي )

المهم

أنتم كلكم وحشتووووووووووووووووووووني من هنا لبكرة

والله المدونين الي سألوا عليا الي بيقولوا فينك ومفتقدينك والكلام ده أنا بقلهم أنا بجد ألي أفتقدت كل واحد فيكم

دي الحقيقة إن الفرد هو الي بيخسر المجموعة مش المجموعة الي بتخسر الفرد إلا لو كان هو طفرة

وطبعاً أنا متأكد أني ممكن أكون ( بفرة ) لكن مش طفرة بالمرة.

ندخل بقي في الموضوع إلي أستفزني أفضي وقت وأقعد أكتب وسيبكوا من موضوع وحشتوني وأفتقدكم والهلس ده هههههههههههههههههههههههههههههههه ندل من يومي أنا.

الموضوع بقي وبصريح العوبارة كده

إن زيارة باراك أوباما نسيتنا خبر

منيل بستين نيلة

ايه هو الخبر بقي يا بلد حكومتها عايز الحرق بجاز معمول فيه بيبي كمان

أن حكومتنا الرشيدة

المعزة بتاعة بكار يعني

طردت عمرو خالد من مصر

من حوالي اربع أيام

طيب ليه هو الراجل ده عمل ايه بس !؟

لا مفيش كان بيعمل حملة أسمها معاً ضد الفقر

يعني م الآخر شغل الطرطور بتاعنا رئيس الجمهورية الأستاذ عمرو خالد بيقوم بيه

يبقي لازم يطردوه ويسحلوه

حسبي الله ونعم الوكيل فيكم يا إلي متعرفوش ربنا كلكم

الخبر مؤكد طبعاً وأكيد في ناس كتير قرأته علي مصراوي أو علي المصري اليوم أو أي مكان تاني لأن الموضوع مش أشاعة يعني

هي دي حكومة الحزب الوثني

مفيش فايدة فيها هيفضلوا كلاب طول عمرهم

وطراطير لأمريكا أن شالله حتي يحكم أمريكا محمد أبو تريكة

والي يشلك

ويبجلك ضغط وسكر وشلل رعاش

إن في ناس أمبارح كانت خلاص حاسة أن الأمل بقي في أوباما

با بني بقر

أوباما ده مش رئيس لمصر

هو أنتم هتفضلوا مش فاهمين لدرجة الغباء المزري ده

أمل أيه بالمسرحية الي جه عملها ومشي

أولاً مفيش رئيس للولايات المتحدة الأمريكية بيتوافق عليه إلا لو اليهود موافقين

وده لأن الكونجرس الأمريكي معظمة يهوووووووود

والحكومة الأمريكية مش بتوافق علي حد كويس

المسئلة كلها أن البلد دي لو مكنش جالها واحد زي أوباما دلوقتي

كانت هتنهاااااااااار ومش هنسمع عنها تاني

فكان لازم ييجي واحد يعدل الميزان المكسور شوية

ما علينا

خلينا في الخبر الي غمني بتاعة أستاذنا عمرو خالد

وبجد أنا قرفت أوي وحاسس

بدون مبالغة والله

أني عايزة أرجع من القرف بتاعة البلد دي.

هتوحشوني جداااااااااااااااااااً لحد ما آجي تاني

ربنا يبارك فيكم بجد بفرح أوي لما أدخل والأقي كل الأحبة مجمعين كده

بس بزعل عشان أنا بعيد.

سلام عليكم جميعاً

أوعي يا جدع

شفتي نيو لوكي الجديد ؟

أصلي

والراجل الي شكله غبي الي فوق ده مش فاهم ايه علاقته بالفن بس اخراج الفيلم ده بيعجبني أوي قلت يلا بقي

وبعدين بصراحه حسيت كده انه بيعبر عن اني بحب الفن اوي

غصب عن عين اي حد م الآخر

ومفيش وقت كتير أقعد أنقي واحد حليوة

زي مهند مثلا الله يحرقه مطرح مهو متنيل

قلت عمو الي شكلة مش نافع ده كويس

وبعدين فكرت احط صورة تامر حسني

وقلت ملوش لازمة اقرف كل مدون يجيلي يلاقي شعر طالع م الشاشة في خلقته قلت خلاص لما يبقي يقفل زرايرصدره دي ابقي احطة

بس برضه لقيت عقبة

شعر حواجبة

طيب والله منا حاطة

قلت طب حط صورة حسين فهمي أهو حليوة برضه وفي ناس بتتهبل عليه مش فاهم ليه

وقلت لا ونعمة بعد البرنامج الرهيب الفظيع الشنيع المريع بتاعه منا حاطة

عاملي برنامج جديد وجايب الي كلت دراع جوزها والي عض عياله والي دخلت الجيش هي ناقصاك يا اخويا

وناقصة هبل اصلها ولا هو كالعادة أكل عيش والسلام خلاص مبقتش تنفع في البوس والأحضان قلت خلاص أديها فضااااااااايح.

طب أحط صورة الشحرورة صباح

معلش مشوها الشحرورة عشان خاطري وأنا مانع اي الفاظ مش ولا بد

لقيت الولية برضه عافا عليها الزمن وبقت شبه العربية الحنطور القديمة الي في أغنيه طيب يا صبر طيب بتاعة الراحل عبد المنعم مدبولي

وبعدين تبقي كارثة لا تفكر تتجوزني عشان حاطط صورتها ما أهو أصل الولية دي ما بتصدق تتجوز كل ربع ساعة كده.

قلت بس

مفيش غير الراجل المسجل قتل في قسم الخليفة ده

ولا ليه عندي مصلحة ولا ليا عنده مصلحة ومش هيعرف يطولني بقي.

بس لو قلتولي شيله

أنا معنديش اي

دم ومش هشيله طبعاً عشان دي مدونتي انا : p

والتااااااج التاااااج التااج ... أوصفلك يا حبيبي التااج

حبيبي هارتي أحمد أبو العيليه ( علي رأي سعاد حسني في الزوجة التانية ) حدفني بالتاج ده علي أساس أني انا الوليد ابن طلال وهقول الي محدش قاله,قلت أشطة يا واد يا تاتو أديها تاج.

أي نعم أنا... جيت بعد الهنا بسنة

بس أقسم بشرفي( علي رأي عماد حمدي الي معرفش كان ازاي فتي الشاشة الأول يمكن عشان ده اول فتي فعلا ييجي الشاشة )

أني مكنتش فاضي خااااااااالث

وانتوا عارفين بقي مكتب رجال الأعمال السودة بتاعي مبهدل المنطوقة كلتها.

المهم قلت يلا بقي مش لازم يا عم تامر تعمل النهاردة 25000 جنيه وخليهم 20000 جنيه بس وضحي بنص ساعة من وقت البزنس بتاعك عشان الناس الحلوين دول.

بالصلاه ع النبي كده هبدأ

كله يركز

مركزين ؟

هزلكوا شوية

خلاص عشان متزهقوش مني بقي

يا قـــــــــــــوي ي ي ي

اسمك أيه ؟

مع أن صيغة السؤال ناقصها قفا وتفكرني بجماعة حبابيبي بس ماشي

تامر دياب

المشهور بيه وسط اصحابك؟

اه .. الأسم الحركي يعني

ماشي يا سعادة البيه انا هقول كل حاجة بس مشي التروماي ده من ورايا

هو كذا أسم يعني لو للدلع كده يبقي تمور

لو للتريقة يبقي

بهنسي

السن ؟

شهر 5 الي جاي دهون ابقي عندي 24 سنة بالصلاه ع النبي ( في عروسة ؟ )

مجال دراستي ؟

كوكتيل

يعني قبل كده كان حسابات وعك بقي

ودلوقتي أعلاااااااام

أسم مدونتي ؟

بحب الفن

بجميع أنواعة ياريس

بس بكتب في اي حاجة عايزها تانية طبعا ولكن انا اخترت الاسم ده عشان أفضل محتفظ بحلمي بالفن المحترم

صورتي الرمزية بتعبر عن ايه ؟

أنا بعشق منظر الغروب وبعتبر القاعده قدامه فيها الهام غريب لأي حاجة تفكر فيها ومع ذلك مش بعرف أستمتع دايما بوقته يعني

هل فكرت فى اغلاق المدونة ؟ والسبب؟

أساسا أنا لسه برش ميه وبقول يا هادي وبستفتح ,أقفلها!؟

ايه رد فعلي لو حد قل ادبه في تعليق ؟

من حق أي حد يقول رأيه

وأنا من حقي أسجنه بسيطة جدا منتهي الديمقراطية :)

لا بجد عادي لو الرد قله زوق هرد لكن لو ابن تيت وترباتيت بقي هشيل الكومنت واكتفي بأني أنصحه يتناقش بأدبه

أسوأ مدونة شفتها ؟

والله ما صادفتش كتير يعني عشان انقي منهم انا بس لفت نظري اسم مدونة عند صديق وعلقت عليه تعليق فل اوي عشان صاحبته كانت مفتخره اوي بالأسم بتاع المدونة .

هيحصل ايه للأيميل بعد ما اموت ؟

هيبقي فيه ميل ملوش صاحب ( وش بيطلع لسانة )

والله فكرت قبل كده في السؤال ده لقيت ان الي هيحصل لاي حاجة بتاعتي هو هو الي هيحصل لميلي بالظبط

يعني مثلا أنا ناوي أن شاء الله أقول للبيت عندنا اني لو مت طلعوا هدومي وحاجتي لله

نفس الموضوع هدي باص ووردي لحد بأتمنه علي حاجتي واقله لو مت ابعت رسايل محترمه للناس بدالي واذكر في اخرها انهم يدعولي.

أنا بحزن أوي لما أفتكر الموت عشان فراق الناس الي بحبهم بس أمر مسلم بيه. :(

أديت الباص وورد لحد قبل كده ؟

لحد دلوقتي لأ

السفر بالنسبالك ايه ؟

انا من عشاق السفر جدا وبالأخص بالليل وفي القطر

بحس أني حر أوي وانا مسافر وبشوف ناس جديدة وأدمغة مختلفة حلوة أدمغة دي.

المود بتاعي ايه ؟

السؤال مش واضح يعني مودي دلوقتي ولا عموماً

عامة دلوقتي حالا مودي اني نفسي انام عشان سهران من امبارح وهخبط راسي في الأسفلت :)

لكن عموما متقلب المزاج وبفرح بسرعه أوي ومش بزعل بسرعه الحمد لله من الناس

بتعمل ايه في وقت فراغك ؟

يا جماعة فراغ ايه انا بقولكوا مضيع 5000 جنيه عشان اقعد الشوية دول معاكوا قدروني بقي متنرفزنيش :)

عادي هعمل ايه يعني هقفل طيارات هليكوبتر !!!؟

زي اي حد

بقرأ

بقعد النت لحد ما يطلعلي ديل م القعده قدامه

بحب أصحابي أوي فغالبا بخرج معاهم كده يعني

الأكلة المفضلة ؟

بعشق حاجة أسمها محشي ورق عنب مع الفراخ مش اللحمة

الملوخية بتاعة والدتي ومحدش يقولي كل واحد بيقول كده

ماما قصة أخري في الموضوع ده

المسقعة من والدتي برضه

وفي اكله برضه بحبها لما اكون جعان وفي شغلي

الطعميه السخنة في فينو سخن مع شرائح الطماطم ( جامدة شرائح دي اوي ) مثقف بالفطرة.

الصفات الي أخذتها من والدك ؟

والله مش عارف اوي بس هخمن كده

ممكن العصبية لما بتعصب ببقي عايز اضرب بالنار عشان اهمد

الكرم والحمد لله

( بعض الغرور لا يفسد للود قضية )

بفرح بسرعة زي بابا

ويمكن في تاني

أكتر ست حاجات بتكرهم ؟

أسرائيل بأعتبارها حاجة مش دولة

الذنوب بتاعتي الي عارفها كويس

الأكتئاب

أخوانا البعدا الي بهدلوا ناس محترمة كتير

الخيانة سواء صديق او حبيب

الخبيزة مع اني عمري ما دوقتها ولا اتعملت في بيتنا والا كنت هاجرت بس اسمها لوحده يكرهها هي نفسها في نفسها

أكتر ست حاجات بتحبهم ؟

أنا أساسا ما بصدق أحب حاجات

مصر

ماما

أخواتي

أصدقائي

المدونين

شبرااااااا

شخصيتك نوعها ايه ؟

لا لا لا

ذكر طبعا احنا هنستهبل ولا ايه ,نوعها ازاي مش فاهم بجد

انا هجاوب وخلاص

يعني بيقولوا دمي خفيف وذكي ومش خبيث

لماذا دخلت عالم التدوين من الأساس ؟

السؤال حسسني انه بيقولي يعني ايه الي بلانا بيك :))

هقولكوا انا اول مره سمعت عن المونات كان من مدونة اسمها ربة السيف والقلم وهي حد محترم جدا زيكوا كده وكبرت في دماغي بقي من ساعتها.

أحلي جملة قيلت في وصف مدونتي ؟

تامر دياب الي بيعشق مصر

أهمية التعليقات بالنسبة ليا ؟

هو يعني بكتب عشان اراجع قبل الأمتحان

ما طبيعي تكون مهمة انا كاتب عشان اعرف الناس دي هتقول ايه في دماغي او عشان انشر موضوع معين الناس تقراه وتعلق عليه

وطبعا مدونة بدون تعليقات ملهاش قيمة عند صاحبها والا يكتب في اي كراسة قديمة عنده من ايام ابتدائي وخلاص.

احلى بوست كتبته؟ ضع اللينك ثم اذكر لماذا؟

نفسي أحضنه

عشان أنا كتبته وانا فعلا في حالة غير طبيعية ولا داعي لوصفها.

أفضل مدونة قرأتها ؟

ياااااااااه

كتير جدا وصعب اوي اقول علي مدونة معينة لاني هنسي كتير

حقيقي والله 90% من المدونات استفدت منها كتير اوي ومتعتني جدا

أفضل بوست قرأته ؟

كل السلسلة بتاعة

مذكرااااااااات ستيتة كلها جميلة وبجد مثال للزواج المحترم والحب الحقيقي وسمعني محمد فؤاد

الشغل بالنسبالك ايه ؟

والله الشغل عموما حاجة وشغلي انا دلوقتي حاجة

يعني دلوقتي بالنسبالي اكل عيش فقط الي ان اشتغل في الي بحبه ومصمم ان شاء الله اشتغل فيه حتي لو اقل من الي انا فيه وناس كتير بتقولي يا ابني مكانك ومش عارف ايه

انا معاكم اوك جدا

بس الي بحبه ده هيبقي فيه ابداع وابتكار لكن كده اسمه

اكل عييييييييش

الأنتر نت بالنسبالك ايه ؟

دنيا تانية غير الي انا عايش فيها اصلا

تمرر التاج ده لمين ؟

كل الي كنت عايز امررلهم التاج ده حد تاني مررهلهم

بس عامة كانوا هيبقوا كالآتي

فتافيت

سوتيتة

عاشقة وغلبانة بس مش ونبي

عمرو تشي

بحر الدموع وحبايب غزة كلهم

تامر مبروك

تامر علي

هيييييييييييييييييه التاج خلص وهرجع اجني الاموال بقي بلا عطلة

(وش رأسمالي شرير )

:p

غلق مصنع تراست ( الخبر حصرياً قبل أي مدون بالعند فيكوا )

بسم الله الرحمن الرحيم

إن الله لا يضيع أجر من أحسن عملاً

صدق الله العظيم

والله يا جماعة مصدقتش نفسي وأنا بسمع الخبر في التليفون من المدون تامرمبروك

صدر قرار بغلق مصنع تراست وإيقاف المرحلتين الثانية والثالثة للمصنع

أول حاجة قلتها الله أكبر

بجد يا جماعة تامر مبروك تعب أوي عشان الموضوع ده ,وأتعرض لعدة مشاكل هو وأسرته وأتهم في قضية سب وقذف وكل ده عشان هو محترم بس أنا بهنيه وبفكره بأن ربنا مش بيضيع تعب حد.
وعلي فكرة تامر كان كاتب موضوع علي العمال الهنود الي كانوا شغالين في مصنع تراست لما هدوا المسجد الي في المصنع وده اللينك الموضوع علي موقع أنصار بور سعيد.

http://www.ansarportsaid.net/newsSrch.asp?ID=1820

بفضل الله دكتور أكرم الشاعر عضومجلس الشعب فضل ماشي ورا الموضوع لحد ما جاب آخر الموضوع وصدر القرار بوقف المصنع الي كان هيضيع بورسعيد , أنا فرحان أوي ليك يا تامر والله ولكل أهل بورسعيد وفرحان أكتر للعدل والحق عشان أخيراً صوتهم علي وظهر وعشان كمان الناس هتعرف أن الي بيعمل حاجة لله ونيته خالصة لازم تقضي.
ربنا يجازيك خير يا دكتور أكرم

وللناس الي مش عارفين مصنع تراست ده كان هيعمل ايه آدي اللينك بتاع الموضوع القديم أهو

http://ba7ebelfan.blogspot.com/2009/02/blog-post_17.html

يلا يا جماعة زي ما وقفنا مع تامر في تعبه وشدته هنفرح كلنا معاه وبيه,وعشان كل واحد فينا يعرف أنه ممكن يغير الدنيا لو كلها غلط وهو بس الي صح.


والله يا جماعة مش شعارات ولا كلام لو عندك الفكرة الصح والنية الصادقة والعزيمة ممكن تهد الدنيا عشان كلمتك وفكرك.

يااااااه تخيلوا أن بجد في ناس كانت قربت تيأس من أنها تغير حاجة في البلد دي ,يا جماعة لأ وهفضل أقولها والله ممكن بس وفر الي قلنا عليه ده وأنت تغير الكوووووون كله .

وأخيراً مبروك يا تامر وربنا يجعلك دائماً سبب في التغيير,وهنشيل البانر القديم ونحط بانر نهني فيه أهل بورسعيد.

أمينة رزق وكريمة مختار

بجد يا جماعة أنا واللع مشغووووووول جداً وغصب عني اني لسه مردتش علي تعليقات الموضوع الي فات بس والله هرد كده كده

وحتي مكنتش فاضي اكتب البوست ده بس فضيت نفسي النهاردة عشان ماما بقي

وخلينا ندخل في العيد ومحدش زعلان مني عشان مردتش لسه.

-----------------------------------------

ماما كوكتيل

والله بجد يا جماعة أمينة رزق في ملامحها لما تزعل علي حد فينا

ولما تنصح حد بتقلب كريمة مختار خالص

واحيانا دكتور شديد لو تعرفوه ( وماله يا اخويا وماله )

رغم انها مش م الفلاحين خالص بس طيبتها عجيبة !

لو كنتوا تشوفوها وهي بتصحيني الصبح

ونعمة هتكرهوني عشانها

ولو شفتوها وهي زعلانه عشان حد فينا من غير ما تعرفوا فيه ايه هتزعلوا

ووارثة خفة الدم الغير طبيعية من ستو ومني :)

قنبلة موقوته في الضحك بجد وبالأخص لو بتتريأ علي حد فينا ( تحفة )

ربنا يخليكي يا ماما ونحبك أكتر من كده وتفضلي تحبينا أوي كده

لما أخويا راح البعثة الربانية بتاعته ورجع وبيقول علي انهم حطوا في ايده كلبشات

قالت بمنتهي الطيبة والبراءة : بقي دول يتحط في ايدهم ( كلابتشات )

كنا هنموووووووووت م الضحك

قلتلها ايه الشلنكبات دي يا ماما أسمها كلبشات.

يارب خليها لينا وخلينا ليها

قعدت أفتكر وأنا صغير لما كنت باخد منها فلوس عشان أجيب ليها هدية عيد الأم هههههههههههههههههه

وأروح أشتري الباكدج مع بعضه

علبة صغيره كده فيها ازازة ريحه عجيبة الشكل والرائحه

بوك من الجلد البلاستيك الي علي ابوه

منديل ( علي أساس أن ماما أم كلثوم يمكن )

وردة صناعي لونها غريب

يعني كانت هدية بالصلاه ع النبي كده مش نافعه بس كنت بجيبها

وكان تمنها باين اتنين جنيه ونص تقريبا

يلا أنما الأعمال بالنيات

كفاية كده بقي عشان أقوم اروح البيت أحتفل مع أخواتي بماما

حمد الله ع السلامة يا دكتور

دكتور سعيد خرج

أخويا خرج يا جماعة وهيشكركوا بنفسه بس لما يستريح

شوية

خرج من ربع ساعة بس من كتابة البوست ده


مش لاقي حاجة اقولها


ربنا أستجاب لكلام عمتنا ستيتة في التعليق الي

فات

آخر الأخبار

تم خلال الأيام الثلاث الماضية أنعقاد جلسات بالمحكمة للحكم بالبرائة (الثانية)علي المعتقلين المتظاهرين تضامنا مع غــزة.
وقد تم ترحيل المحكوم لهم بالبرائة أمس وأول أمس إلي (لاظوغلي).
كما نطقت المحكمة البرائة (الثانية) أيضا لمجموعة أخري اليوم الخميس الموافق 11/3/2009 وسيتم ترحيلهم (لاظوغلي) بعد غد الموافق السبت 13/3/2009 ( دي المجموعة الي فيها أخويا)

الدعاء يا جماعة عشان هانت

وحشتوني جدااااااااااااااا ومعايا خبر عدل اخيراً

والله وحشتوني ووحشني دماغكوا العالية ووحشني خفة دمكوا وفقركوا ومشاكلكوا وأفراحكوا وأحزانكوا ومشاعركوا وكل اي حاجة اخرها كو.

ومش عارف أشكر الناس الي سئلت عليا ازاي سواء علي المدونة أو علي التليفون بس يعني ربنا كده يعني هو يارب أن شاء الله يعني يارب انت عارف بقي.

طبعا تغيبت الفترة الي فاتت لعدة أسباب ولكن الحمد لله خير جدا

السبب الأول يعني كان عندي عقيقة بنت خالي الرابعة

يعني خالي جاب ما شاء الله رابع بنت

يعني المقاطيع يا فتافيت زادوا واحدة اهو :)

والحمد لله هو مبسوط بيها جداً وربنا يكرمه ويربيها زي الباقين كده

والسبب التاني بقي أن ستو تعبانة وبقت بتوه بقي ومش عارفة مين ده ومين دي والحياة بالنسبة ليها بقت عجوي

وهي دمها خفيف بشكل بشع اصلا زاد عليها بقي الموضوع ده خلاها تحفة في الضحك .ربنا يشفيها يارب

وطبعا هي أصلا عايشة بأنبوبة الأكسجين.

فكنت بزورها بقي وطبعا زيارتها بتطول شوية مش زي اي زيارة يعني نظام ازيك وعشر دقايق واروح زي ما بعمل في اي حتة لأ دي بتاعة أقعد يومين كده معاها. وأنا عارف لما أروحلها تاني هتقولي بقي كده يا تامر متجيش تشوفني وانا تعبانة وهتنسي أصلاً . خير.

السبب الأخير والقنبلة بتاعة البوست بقي

أنا بفتح مكتب خدمات رجال أعمال ... هيييييييييييييييييييييه تصفيق حاد

وحد يديني مقص أقص الشريط

ويا جماعة مش قادر أوصف ليكوا المكتب كبير اد ايه لدرجة اني مش عارف اجيب عمالة ليه منين ؟


فكرت أعمل أعلان في الوسيط علي شباب عايز شغل وبعدين قلت اجيب ناس ضامنهم احسن


عموما عشان مضحكش عليكوا اكتر من كده المكتب مساااااااحته تلاته متر وكسر في تلاتة متر وكسر ومحدش يتريق عليا :((


بس هو يؤدي الغرض بتاعة الحمد لله .


وأن شاء الله خلال الأسبوع ده الأفتتاح يعني لسه بوضب وأخوكوا بيشحت حد يجيب حاجة بقي


ألهي ما يعريلكوا جتة ولا يرقعلوكوا جاكتة

بث خلاث

وبالنسبة لموضوع أخويا بقي هو أن شاء الله خارج خلال العشرة أيام القادمة.

مصنع الرجال باعت ليكو هدية

حالتي قبل زيارة المعتقلين الي كنت كتبت عنهم في بوست مكنتش عايز اكتب الفترة دي ... بس هو الي طلب مني كانت فوق الوصف

كنت حاسس ان خلاص انا جبت آخر حاجة عندي وكنت بتمني اني اموت واستريح او افقد الذاكرة ,بس لما رجعت م الزيارة وقريت الرسالة الي مبعوته ليكوا من مصنع الرجال والله يا جماعة حصل أنقلاب في فكري وحالتي النفسية.

يا جماعة الرسالة دي اتقالي بالنص دي للمدونين الي عارفين الموضوع

هكتب ليكوا نص الرسالة وبعدها هكتب رسالة من أخويا لأختي

الرسالة الأولي

أحلام الأمس هي حقائق اليوم

وأحلام اليوم هي حقائق الغد

وإن كل كلمة عاشت .. قد أقتاتت من قلب صاحبها

وإن كلماتنا عرائس من الشمع .. حتي أذا متنا في سبيلها .. دبت فيها الروح

وأخـيـــراً

وليعلم قومنا أنهم أحب الينا من أنفسنا

وإنه لحبيب إلينا

أن تذهب فداءً لعزتكم

إن كان فيها الفداء

الرسالة دي كلها جمل مأثورة وليست من تأليفهم ولكن الرسالة اتكتبت وأنا قاعد فكانت علي عجالة

الرسالة الثانية

ودي موجهة لأختي وأنا أستأذنت منه أني أنشرها

أختي الحبيبة / ...............

وحشتيني

ووحشتوني كلكم

أذكرك بآخر مشهد في فيلم في بيتنا رجل عندما قال عمر الشريف جملة عن الحرية وكيف تتحقق

وأذكرك بكل الأفلام التي رأيناها سوياً وما فيها من تضحيات لتتحقق الأمنيات

كنت أود أن أحيا كالناس لأسرة أكافح لها فقط ولكن حرية البلاد والعباد وتأمين لقمة العيش والعمل الشريف

والأستقامة للشباب وحماية مقدساتنا وشرف الأمة وهداية البشرية كل هذه الأهداف تحتاج لتضحية وجهد.

وأقول لكي واثقاً متيقناً أن الله لن يحرم من وهب حياته لمثل هذه الأهداف .. أقول لن يحرمه من عيشة هنية وحياة طيبة في الدنيا قبل الآخرة.

هذا وعد الهي من الله

( ومن عمل صالحاً من ذكر أو أنثي وهو مؤمن فلنحيينه حياة طيبة )

......... ثقي أن تاريخ البشرية - وفي كل صفحة من صفحاتة - أن سبيل الحرية والكرامة والعزة والسعادة..

في الدنيا قبل الآخرة

وكل آت قريب

أخوكي

.....................

23 فبراير 2009

أنا لما قرأت الرسالتين مكنتش عارف أعمل أيه

أقوم أحضنه وأهنيه علي الرجولة

ولا أعمل أيه

والحمد لله ده كان سبب رفع روحي المعنوية النهاردة بعد الكبوة الي فاتت دي

- وطلب مني اكتبله كلمات اغاني وطنية عشان عايزين يقولوها جوه وملاني الأغاني دي :

أنا النيل مقبرة للغزاة بتاعة سعاد محمد

وكده ومش كده بتاعة أحمد أسماعيل وكلمات فؤاد حداد

وأزرع كل الأرض مقاومة لأحمد اسماعيل برضه

وأغنية بحبك يا مصر بتاعة فايزة

وقالي لو عندك حاجة انت شايفها حلوة برضه اكتبهالي وهاتها معاك الزيارة الجاية

وقالي اغنية استغربت اوي انه طلبها

اغنية صورة بتاعة عبد الحليم حافظ

بس لما مشيت وقعدت افتكر كلامها تخيلت منظرهم وهما بيغنوها جنب بعض

وتحديداً الكوبيله ده :

يا زمان صورنا

صورنا يا زمان

هنقرب من بعض كمان

هنقرب من بعض كمان

وإلي هيبعد م الميدان

إلي هيبعد م الميدان

عمره ما هيبان في الصورة

متزعلوش مني بس لازم الجرعة دي عشان نفوق

والله آسف بس لازم تشوفوا عشان نصحي ونعرف ان في رجالة قبلينا أتبهدلوا عشان البلد دي

وهي تستاهل أننا نتبهدل عشانها بجد

وقفوا اغنية شادية وتابعوا الفيديو وحتي الي شاف الفيلم قبل كده دي تجميع لأهم مشاهده

تامر يا مبروك...مبروك عليك الرجولة بجد

بعد ما الحكومة اكلتنا لحوم الكلاب لما الناس بقت بتهوهو علي بعض وبعد ما وقفونا طوابير لما طلعوا عين اهالينا كلنا في كل حتة وبعد ما غرقوا أهالينا في العبارة وخلوا ملناش سعر في اي بلد ربنا ينتقم منهم وبعد ما برئوا ممدوح اسماعيل صاحب الكارثة وبعد ما برئوا هاني سرور بتاع أكياس الدم الفاسدة وبعد وبعد وبعد والله الواحد مش عارف يقول ايه ولا ايه .

المهم أن آخر حاجة الحكومة عايزاها انها تسمنا وتسرطنا (أكتر ما أحنا متسرطنين من الأكل المتنيل) بمصنع تراست

بس الحمد لله ربنا جعل تامر مبروك رمز من رموز الرجولة في بلد أنعدمت فيها الرجالة إلا من رحم ربي ووقف ليهم وأتبهدل عشان أهل بور سعيد واتعرض للضغط الشديد والأتهامات الظلم من ولاد الكلب الي ميعرفوش ربنا كالعادة وأتحكم عليه بغرامة 42000 جنيه عشان بيدافع عن أهل بورسعيد

أهل بورسعيد إلي دافعوا عننا كلنا وعن أهالينا زمان ... فاكرين بورسعيد يا جماعة؟ ... فاكرين المقاومة والفدائيين ؟ولا الكلام ده بقي

قديم ومحدش فاكره, ولا في الأفلام العربي بس!؟

دوركوا جه يا جماعة عشان تردوا الجميل لأهل بورسعيد

الي وقفوا في وش الأنجليز وخرجوهم بطرح بلدي قبل كده

يا جماعة الرجولة مبتتشحتش ... الرجولة مبتتدرسش ... الرجولة من عند ربنا

خليكوا رجالة وجدعان وتضامنوا مع الحق

الراجل ده عشان يعمل الي عمله ده بدون ما أشرح التفاصيل لأنكوا هتلاقوا التفاصيل كلها علي مدونته أتبهدل وفقد

حاجات كتير اوي

بس كسب حاجة يارب نكسبها كلنا

الرجـــــــولـــة والشــهــامــــة

يا جماعة أنا مش عايز أطول أكتر من كده الي عايز يعمل حاجة عشان مصر

وعشان بور سعيد جزء مننا ومن مصر الي هي أحنا

مدونته أهي أقرأ التفاصيل

http://elhakika.blogspot.com/

وأكتب بوست تضامن

أدعيله

حط بانر عندك

أتصل بيه وقوله أحنا معاك يا راجل في زمن الرجالة قلت فيه

أنشر القضية

أحضر جلسة الاستئناف يوم 17 مارس الي جاي لو تقدر

يا جماعة أحنا محتاجين نقول لا بصوت عاااااالي ومحدش يخاف

هيتعمل فينا ايه اكتر من كده

مكنتش عايز اكتب الفترة دي .. بس هو الي طلب مني

كنت في زيارة أخويا الاسبوعية كالعادة كل أثنين ودي كانت أول مره أروح الزيارة لوحدي يعني من غير ما يكون حد من البيت معايا وهو الي طلب ده عشان ميتعبهمش معاه فمخدتش حد ورحت انا وقعدنا نتكلم انا وهو علي كل حاجة بقي جوه عنده وبره عندي

وحكيتله علي رأي المدونين الي كان وصلني قبل كده علي بوست قديم ومن ناس كلمتني وقلتله ربنا يعينكوا ربنا يعلم في ناس بره كان نفسها تبقي معاكم وفي ناس بتبكي عشانكوا اد ايه .

وكالعادة تعبيرات وشه كان باين عليها انه مش عايز يسمع الكلام ده عشان ثوابه ميضعش وبعدين طلب مني أني أنشر كل حاجة حصلت هناك معاهم وبرنامجهم بيمشي ازاي واكلهم وشربهم وكله فقلتله اوك.

وابتدينا نتكلم بقي وحكالي علي اول يوم اتاخدوه فيه من المسيرة ومين وقف ومين جري ومين ضرب في الامن ومين اضرب ومين اتاخد تلات مرات وهرب وحكالي علي ان فيه اتنين نطوا من العربية وهي ماشية بسرعه عشان بابها اتفتح في طريق المقابر وهما رايحين علي معسكر الأمن المركزي في طره أول ما أتاخدوه. وقالي انهم كان ممكن ينزلوا هما كمان بس العساكر غلابة قعدوا يقولوا بلاش ونبي اعملوا معروف احنا هنتبهدل كده فمرضيوش يجروا.

وقالي ان فيه واحد معاه جوه كان في مبني امن الدولة جابر بن حيان وقالهم ان فرحوا بعد اسبوع اصلا وده حقيقي

وطبعا هما اصحاب واجب فلازم يعملوا معاه حاجة عشان دخلته كمان اسبوع , راحوا معلقينه 7 ساعات ومكهربينه كهربا عالية في أماكن حساسة والظابط قاله عشان تعرف تتجوز. حسبنا الله ونعم الوكيل فيكوا يا كلاب

وواحد تاني كان في مبني امن الدولة الشيخ زايد

كانوا بيسئلوه عن حاجة معينة فقالهم معرفش فأبتدوا يكهربوه فقال والله العظيم ما اعرف حاجة راح الظابط قايله متقلش والله قولي واللاتي والعزة وقعدوا يضحكوا. ربنا ينتقم منكوا يا ولاد الكلب

وحكالي عن برنامجهم جوه المعتقل دلوقتي بقي :

اول حاجة بيصحوا الساعة 3.30 فجراً يصلوا قيام كل واحد لوحده وبعدها مع بعض وبعدها صلاة الفجر ويقعدوا يقولوا الأذكار ولو حد عايز يقعد ياخد ثواب حجة وعمره بعد الفجر للضحي يقعد الي عايز ينام ينام.

وبعدها يصحوا الساعة 9 صباحاً وعندهم تريض لحد الساعة 3 العصر يعني يخرجوا من الزنزانة للملعب الأسمنتي ويعملوا الي هما عايزينة بيقعدوا بقي يلعبوا كورة وطايره ويد ويجروا شوية ويلعبوا شوية سويدي يعني.

وبعدها يرجعوا الزنازين الي بيذاكر ماجستير والي بيقرأ في اي كتاب من الي طلبهم في الزيارة والي بيقرأ قصة او قرآن يعني.

وبعدها يصلوا المغرب ولو حد صايم يفطر وكده كده هو ده وقت الاكل بتاعهم.

طبعا بياكلوا اكل الزيارة مش اكل السجن المعفن.

اه صحيح اول ما دخلوا كان وقت التريض ساعة واحدة بس راحوا عاملين اضراب عن الطعام ورفضوا يخرجوا الساعة دي راحوا مزودين الوقت لحد 6 ساعات.

طبعا اكل الزيارات انضف اكل لكن اكل المعتقل ممكن اديكوا نبذه عنه

هو عبارة عن عيش وحلاوة وجبنة......فطار

ارز ولحمه وخضار .....غدا بس المفروض انهم زي منا قلت لحمة مش كاوتش وارز مش بعليصه وخضار مش ميه مجاري

والعشاء شرح الفطار كده

بالليل بعد العشاء بقي يبتدوا حفلة سمر

اه والله يا جماعة بيقعدوا يغنوا اغاني وطنية واناشيد ويمثلوا اسكتشات ومعاهم ناس اخويا بيقولي دمهم فقر مش طبيعيين وكلهم طبعا دكاترة ومهندسين وصيادلة ومحاسبين.

ومحاضرات بقي في كل المجالات يعني الدكتور يعلمهم حاجة والمهندس يقلهم حاجة والمحاسب يعرفهم حاجة والي بيقرأ تنمية بشريه يعلهم حاجة محاضرات ودروس كلها مهمة جدا وبتبقي يومية لمدة ساعة ونصف.

الحمام

الحمام في اول ما كانوا في معسكر الامن المركزي كان كارثة بالنسبة لهم اخويا بيقولي معموله ربع ستارة كده يعني

لو نظر أحدهم تحت قدميه لرآنا , وكانوا اول ما اتاخدوا 1100 واحد وطبعا صفوهم ودلوقتي كلهم 166 واحد في معتقل المرج. وفي شوية في طره.

طبعا اي حد بيخرج لازم يعدي الاول علي امن الدولة وبعدها يروح بيتهم فأدعولهم بقي لو راحوا امن الدولة ربنا يخفف عنهم أو يروحوا من هناك علي طول مع ان ده مستحيل لازم ينوروهم الاول.

والله يا جماعة مكنتش هكتب خالص بوستات لحد ما افوق انا عشان مضايقش حد بس هو الي طلب مني.

وقالي أنا خايف الناس تخاف أحنا مش عايزين حد يخاف بالعكس.

قلتله أنا عارف ان الي هيقرأوا الكلام ده ناس محترمة وبتفهم ومحدش فيهم هيخاف بالعكس.

عارفين البيت الي في أغنية شادية الي انا حاططها دي بتاع

مشفش الرجال .. السمر الشداد فوق كل المحن

والله لما بسمعه بحس اني هموت ولما بشوفهم بعرف ان هما دول الرجال بس

أنا وأنا

أجلس في هذا اليوم واتخيل أنني ونفسي أثنان

أنا ... ونفسي هي أنتِ ..


أسئلك عن المكان المناسب

فتختاري نفس مكاننا القديم

ونذهب حيث أردتي

سابحين في عالمنا الخاص بنا

عالم نحب فيه حبنا المتبادل

ونصل حيث قصدنا

فيفتح لنا نادل القاعة بابها

فأساعده في فتح الباب لكي

فتخطي بقدمك الباب وتأخذيني بيدك

كي أتقدم أنا المسير وتخبريني

أن هذا يشعرك بالأمان

نمشي حتي تأتي جلستنا الشهيرة

فيبتسم النادل أبتسامة معناها

كما تعودتم يا سيدتي

وتنظري في عيني

فتحتويني النظرة في عالم آخر

أجمل من عالمنا هذا !

فأبادلك النظرة ولكني أشعر أني

أنظر لكي وأنا بداخل عيناك

فأتلفت من كل جانب حولي داخل عينك

حتي تستطيع عيني أحتوائك كما أحتويتيني

واخرج من عينك علي صوت النادل

يقول لما اراك سيدي حزينا

ولما لم تأتي سيدتي معك

تلك الليله !