مكنتش عايز اكتب الفترة دي .. بس هو الي طلب مني

كنت في زيارة أخويا الاسبوعية كالعادة كل أثنين ودي كانت أول مره أروح الزيارة لوحدي يعني من غير ما يكون حد من البيت معايا وهو الي طلب ده عشان ميتعبهمش معاه فمخدتش حد ورحت انا وقعدنا نتكلم انا وهو علي كل حاجة بقي جوه عنده وبره عندي

وحكيتله علي رأي المدونين الي كان وصلني قبل كده علي بوست قديم ومن ناس كلمتني وقلتله ربنا يعينكوا ربنا يعلم في ناس بره كان نفسها تبقي معاكم وفي ناس بتبكي عشانكوا اد ايه .

وكالعادة تعبيرات وشه كان باين عليها انه مش عايز يسمع الكلام ده عشان ثوابه ميضعش وبعدين طلب مني أني أنشر كل حاجة حصلت هناك معاهم وبرنامجهم بيمشي ازاي واكلهم وشربهم وكله فقلتله اوك.

وابتدينا نتكلم بقي وحكالي علي اول يوم اتاخدوه فيه من المسيرة ومين وقف ومين جري ومين ضرب في الامن ومين اضرب ومين اتاخد تلات مرات وهرب وحكالي علي ان فيه اتنين نطوا من العربية وهي ماشية بسرعه عشان بابها اتفتح في طريق المقابر وهما رايحين علي معسكر الأمن المركزي في طره أول ما أتاخدوه. وقالي انهم كان ممكن ينزلوا هما كمان بس العساكر غلابة قعدوا يقولوا بلاش ونبي اعملوا معروف احنا هنتبهدل كده فمرضيوش يجروا.

وقالي ان فيه واحد معاه جوه كان في مبني امن الدولة جابر بن حيان وقالهم ان فرحوا بعد اسبوع اصلا وده حقيقي

وطبعا هما اصحاب واجب فلازم يعملوا معاه حاجة عشان دخلته كمان اسبوع , راحوا معلقينه 7 ساعات ومكهربينه كهربا عالية في أماكن حساسة والظابط قاله عشان تعرف تتجوز. حسبنا الله ونعم الوكيل فيكوا يا كلاب

وواحد تاني كان في مبني امن الدولة الشيخ زايد

كانوا بيسئلوه عن حاجة معينة فقالهم معرفش فأبتدوا يكهربوه فقال والله العظيم ما اعرف حاجة راح الظابط قايله متقلش والله قولي واللاتي والعزة وقعدوا يضحكوا. ربنا ينتقم منكوا يا ولاد الكلب

وحكالي عن برنامجهم جوه المعتقل دلوقتي بقي :

اول حاجة بيصحوا الساعة 3.30 فجراً يصلوا قيام كل واحد لوحده وبعدها مع بعض وبعدها صلاة الفجر ويقعدوا يقولوا الأذكار ولو حد عايز يقعد ياخد ثواب حجة وعمره بعد الفجر للضحي يقعد الي عايز ينام ينام.

وبعدها يصحوا الساعة 9 صباحاً وعندهم تريض لحد الساعة 3 العصر يعني يخرجوا من الزنزانة للملعب الأسمنتي ويعملوا الي هما عايزينة بيقعدوا بقي يلعبوا كورة وطايره ويد ويجروا شوية ويلعبوا شوية سويدي يعني.

وبعدها يرجعوا الزنازين الي بيذاكر ماجستير والي بيقرأ في اي كتاب من الي طلبهم في الزيارة والي بيقرأ قصة او قرآن يعني.

وبعدها يصلوا المغرب ولو حد صايم يفطر وكده كده هو ده وقت الاكل بتاعهم.

طبعا بياكلوا اكل الزيارة مش اكل السجن المعفن.

اه صحيح اول ما دخلوا كان وقت التريض ساعة واحدة بس راحوا عاملين اضراب عن الطعام ورفضوا يخرجوا الساعة دي راحوا مزودين الوقت لحد 6 ساعات.

طبعا اكل الزيارات انضف اكل لكن اكل المعتقل ممكن اديكوا نبذه عنه

هو عبارة عن عيش وحلاوة وجبنة......فطار

ارز ولحمه وخضار .....غدا بس المفروض انهم زي منا قلت لحمة مش كاوتش وارز مش بعليصه وخضار مش ميه مجاري

والعشاء شرح الفطار كده

بالليل بعد العشاء بقي يبتدوا حفلة سمر

اه والله يا جماعة بيقعدوا يغنوا اغاني وطنية واناشيد ويمثلوا اسكتشات ومعاهم ناس اخويا بيقولي دمهم فقر مش طبيعيين وكلهم طبعا دكاترة ومهندسين وصيادلة ومحاسبين.

ومحاضرات بقي في كل المجالات يعني الدكتور يعلمهم حاجة والمهندس يقلهم حاجة والمحاسب يعرفهم حاجة والي بيقرأ تنمية بشريه يعلهم حاجة محاضرات ودروس كلها مهمة جدا وبتبقي يومية لمدة ساعة ونصف.

الحمام

الحمام في اول ما كانوا في معسكر الامن المركزي كان كارثة بالنسبة لهم اخويا بيقولي معموله ربع ستارة كده يعني

لو نظر أحدهم تحت قدميه لرآنا , وكانوا اول ما اتاخدوا 1100 واحد وطبعا صفوهم ودلوقتي كلهم 166 واحد في معتقل المرج. وفي شوية في طره.

طبعا اي حد بيخرج لازم يعدي الاول علي امن الدولة وبعدها يروح بيتهم فأدعولهم بقي لو راحوا امن الدولة ربنا يخفف عنهم أو يروحوا من هناك علي طول مع ان ده مستحيل لازم ينوروهم الاول.

والله يا جماعة مكنتش هكتب خالص بوستات لحد ما افوق انا عشان مضايقش حد بس هو الي طلب مني.

وقالي أنا خايف الناس تخاف أحنا مش عايزين حد يخاف بالعكس.

قلتله أنا عارف ان الي هيقرأوا الكلام ده ناس محترمة وبتفهم ومحدش فيهم هيخاف بالعكس.

عارفين البيت الي في أغنية شادية الي انا حاططها دي بتاع

مشفش الرجال .. السمر الشداد فوق كل المحن

والله لما بسمعه بحس اني هموت ولما بشوفهم بعرف ان هما دول الرجال بس