كأنك حضنت الجمال إلي في الدنيا كله
تخيل لو حضنت الورد
أو حضنت صوت البحر
أو حضنت السما ساعة الغروب
أو تخيل أنك بتحضن الألوان
أو بتحضن صمود الجبال
أو بتحضن أرض خضرة
أو تخيل بجد أنك بتحضن الحنية نفسها..ممكن ؟
أو بتحضن الكرامة متجسدة في صورته
أو بتحضن بني آدم جسمه هو الصبــر
أو بتحضن التضحية
أو بتحضن فارس أنقذك من الأسر
أو بتحضن رسول شايلك خبر جميل
مبحسش بكل ده إلا لما أحضن سعيد اخويا
يمكن عشان هو إلي كبرت قدام عينه
وكان بياخدني معاه كل حته هو رايحها رغم فرق السن
ولا عشان هو أخويا فلازم يبقي كده .. معتقدش
ولا عشان هو بيضحي أوي عشاني
ربنا يفك اسرك يا سعيد عشان أنا تعبان أوي من غيرك
هاى يا تامر
ردحذفأنا طبعا مش عارفة أخوك ماله , لكن بجد تأثرت لما قلت , ربنا يرجعه لكم بسلامة ان شاء الله.
ازيك يا سارة
ردحذفاولا شكرا علي زيارتك وشعورك
ثانيا أنا اخويا موضوعه انه دكتور وكان في مظاهرة عشان غزة في رمسيس
واعتقل
بس
أسئل الله أن يفك أسره
ردحذفولكني معترض علي هذه المظاهرات وأري أنها لا تجدي , فما معني أن أقف لكي أهتف وأندد وانا لا أغير شيئاً!
والأفضل هو أن أتبرع بالمال وأن أساعد في جمع التبرعات وأن نقاطع ولكن لا أري جدوي من المظاهرات التي أعرف أنها سلمية ولا تضرر الأمن ولا المنشآت العامة بشيء.
أحمد عثمان
ربنا يفك اسره يارب
ردحذفأحمد عثمان
ردحذفــــــــــ
هقلك حاجة يا أستاذ احمد
أكيد حضرتك عارف يعني ايه رأي عام ويعني أيه أنك لو من غزة وشفت الناس بتعمل ايه في الشوارع العربية والأوربية كلها عشانك هيبقي أحساسك وروحك المعنوية شكلها ايه؟
وبعدين يعني هي الناس الي بتعمل مظاهرات علي مستوي العالم دي كلها مغيبة؟!!!
وبعدين أنت هتنشر القضية ازاي للناس الي ولا بتقعد علي انترنت ولا عندهم دش ولو عندهم هيبقوا قاعدين قدام روتانا سينما هتسيب علامة في وشك
وحتي لو بيقعد علي النت وبيشوف الدش علي الأخبار
دوره هيعرفه منين ؟
منك ومني ومن كل واحد بينزل في مظاهرة سلمية للتعبير عن رأينا الي علي طول مش بنقدر نقوله في مصر.
أضافة لكل الي انت ذكرته من تبرعات بأنواعها المظاهرات دور كبير أوي علي مدار التاريخ وأكيد حضرتك قريت وعارف
شكرا لزيارتك
بت خيخة واي كلام
ـــــــــــــــ
والله مبسوط جداً لزيارتك لأول مره للمدونة
وربنا يفك اسر المصريين كلهم بقي عشان هيموتوا من غير ميصرخوا حتي
الله على تشبيهاتك
ردحذفرائعه جدا بجد
وربنا يبارك فى اخوك
ويحفظو ويحميه ياااااااارب
تحياتى ليك ودعواتى لاخوك
همس
ردحذفوالله ولا تشبيهات ولا حاجة ده كلام بجد حاسه لدرجة رهيبة ده غير أني كنت بكتبه لحظة خنقة أوي
شكرا لزيارتك ونورتي المدونة
شعور جميل جدا
ردحذفإن شاء الله ربنا يعيده إليك سالما
شكرا أوي يا مراكبي علي مرورك عندي وربنا يرجعه بالسلامة ويستجيب لدعائنا
ردحذفياأخي وجعت قلبي
ردحذفلسه ها أهزر لقيت كلام تحفة محدش دلوقتي بيقوله لأخوه
وبعدين عرفت عن اللي حصل من التعليقات
طيب ممكن ياراجل ياطيب تقول لي الاخبار دلوقتي ايه؟
ادعو الله العظيم رب العرش العظيم أن ينجيه هو وكل شباب مصر اللي يدوب بيعبروا عن رأيهم زي كل بلاد العالم في الأحداث دي
لازم ترد
على فكرة بما انك مواطن شبراوي يبقى اهلا وسهلا أقرأ بوست والله لو مابعدت ياعبدو لأوريك وانت تشوف ذكرياتي عن شبرا اللي هي بيت جدتي القديم وأخوايا مولود فيها فطول النهار واجع نفوخنا انا من شبرا؟؟؟؟؟؟؟؟؟؟ طمني لو سمحت على اخوك
مودتي
ستيته حسب الله الحمش
ردحذفبجد ربنا يكرمك علي شعورك الجميل وكفاية مرورك عندي شرفني بجد
وربنا يفرج عنه هو وكل شباب مصر المتبهدل علي طول
وللأسف الشديد لسه مرجعش والله ورايح ازوره غداً
ربنا يكرمه
كلامها مؤثر جدا .. وكنت داخلة اسأل مين سعيد
ردحذفبس من الكومنتس عرفت هو مين
ربنا يرجعه بسلامه ان شاء الله
ويخليكم لبعض .. دلوقتي عرفت ليه احساسك عالي
في كتابة البوست .. لانه من جواك اوي
ربنا يفك اسره ان شاء الله
قريب ان شاء الله قريب
فتافيت
ردحذفكان نفسي بصراحة كل الي اول مره يدخل عندي يلاقي بوست متفائل شوية عن كده بس معلش والله غصب عني بصدق
وشكرا علي زيارتك الجميلة دي وإن شاء الله يرجع بالسلامة
أنا مؤمن بالحكمة بتاعة أشتدي كربة تنفرجي
السلام عليكم ورحمة الله وبركاته
ردحذفكلمات جميله جدا بجد ما شاء الله
تعبير اكتر من رائع عن مشاعرك الراقيه الرقيه دي تجاه اخوك
ياريت كل الاخوات يبقوا كده بجد :)
ربنا يخليكوا لبعض يارب :)
تحياتي :)
أحلي حياة
ردحذفشكرا علي مرورك علي مدونتي
و
آمين يارب
لألألألألألألألألألألألألألأ انا مبحبش كده
ردحذفكل يوم ادخل ادور ع البوست الجديد ملقيش
فين الأنتاج اللي يعرفني انك بتحب الفن وجنبه بتحب ايه كمان؟
شد حيلك كده
المؤمن القوي احب الى اله من المؤمن الضعيف وفي كل خير
تحياتي ومستنية بوست فوري يعرفني مين تامر دياب
ستيتة حسب الله الحمش
ردحذفتصدقي اني كنت لسه هكتب اعتزار للناس اني مش قادر اكتب الايام دي عشان مخليش حد يتخنق مني وكفاية انا
الدعاء بس منكوا وانا ان شاء الله هكتب حاجة.
اخي في الله
ردحذفربنا يقويك ويعينك ويابختك ان ربنا اداك اخ زي د-سعيد وربنا يفك اسره ويجعله في ميزان حسناته انتوابشر صعب تواجدهم في الزمن دة زمن فيه كل حاجة خلف خلاف ربنا معاكم
غير معرف
ردحذفربنا يكرمك ويجازيك او يجازيكي خير علي الدعاء والزيارة
وممكن تبقي تحط او تحطي امضاء في الاخر اعرف منه الاسم فقط
لالالا سيبك من ده كلو
ردحذفبأمانة انا سرحتمع اغنية شادية اللى انتا حاتطها دى
بجد جميلة جدا بتحسسنى ان مصر لسه بخير
البت المشمشية
ردحذفالأغنية دي من الأغاني الوطنية الي بتموتني
بتخليني نفسي اشوف مصر بقي عشان تعبت ,بس مصر الي في الأغنية مش الي محتلة دي