حبيبي هارتي أحمد أبو العيليه ( علي رأي سعاد حسني في الزوجة التانية ) حدفني بالتاج ده علي أساس أني انا الوليد ابن طلال وهقول الي محدش قاله,قلت أشطة يا واد يا تاتو أديها تاج.
أي نعم أنا... جيت بعد الهنا بسنة
بس أقسم بشرفي( علي رأي عماد حمدي الي معرفش كان ازاي فتي الشاشة الأول يمكن عشان ده اول فتي فعلا ييجي الشاشة )
أني مكنتش فاضي خااااااااالث
وانتوا عارفين بقي مكتب رجال الأعمال السودة بتاعي مبهدل المنطوقة كلتها.
المهم قلت يلا بقي مش لازم يا عم تامر تعمل النهاردة 25000 جنيه وخليهم 20000 جنيه بس وضحي بنص ساعة من وقت البزنس بتاعك عشان الناس الحلوين دول.
بالصلاه ع النبي كده هبدأ
كله يركز
مركزين ؟
هزلكوا شوية
خلاص عشان متزهقوش مني بقي
يا قـــــــــــــوي ي ي ي
اسمك أيه ؟
مع أن صيغة السؤال ناقصها قفا وتفكرني بجماعة حبابيبي بس ماشي
تامر دياب
المشهور بيه وسط اصحابك؟
اه .. الأسم الحركي يعني
ماشي يا سعادة البيه انا هقول كل حاجة بس مشي التروماي ده من ورايا
هو كذا أسم يعني لو للدلع كده يبقي تمور
لو للتريقة يبقي
بهنسي
السن ؟
شهر 5 الي جاي دهون ابقي عندي 24 سنة بالصلاه ع النبي ( في عروسة ؟ )
مجال دراستي ؟
كوكتيل
يعني قبل كده كان حسابات وعك بقي
ودلوقتي أعلاااااااام
أسم مدونتي ؟
بحب الفن
بجميع أنواعة ياريس
بس بكتب في اي حاجة عايزها تانية طبعا ولكن انا اخترت الاسم ده عشان أفضل محتفظ بحلمي بالفن المحترم
صورتي الرمزية بتعبر عن ايه ؟
أنا بعشق منظر الغروب وبعتبر القاعده قدامه فيها الهام غريب لأي حاجة تفكر فيها ومع ذلك مش بعرف أستمتع دايما بوقته يعني
هل فكرت فى اغلاق المدونة ؟ والسبب؟
أساسا أنا لسه برش ميه وبقول يا هادي وبستفتح ,أقفلها!؟
ايه رد فعلي لو حد قل ادبه في تعليق ؟
من حق أي حد يقول رأيه
وأنا من حقي أسجنه بسيطة جدا منتهي الديمقراطية :)
لا بجد عادي لو الرد قله زوق هرد لكن لو ابن تيت وترباتيت بقي هشيل الكومنت واكتفي بأني أنصحه يتناقش بأدبه
أسوأ مدونة شفتها ؟
والله ما صادفتش كتير يعني عشان انقي منهم انا بس لفت نظري اسم مدونة عند صديق وعلقت عليه تعليق فل اوي عشان صاحبته كانت مفتخره اوي بالأسم بتاع المدونة .
هيحصل ايه للأيميل بعد ما اموت ؟
هيبقي فيه ميل ملوش صاحب ( وش بيطلع لسانة )
والله فكرت قبل كده في السؤال ده لقيت ان الي هيحصل لاي حاجة بتاعتي هو هو الي هيحصل لميلي بالظبط
يعني مثلا أنا ناوي أن شاء الله أقول للبيت عندنا اني لو مت طلعوا هدومي وحاجتي لله
نفس الموضوع هدي باص ووردي لحد بأتمنه علي حاجتي واقله لو مت ابعت رسايل محترمه للناس بدالي واذكر في اخرها انهم يدعولي.
أنا بحزن أوي لما أفتكر الموت عشان فراق الناس الي بحبهم بس أمر مسلم بيه. :(
أديت الباص وورد لحد قبل كده ؟
لحد دلوقتي لأ
السفر بالنسبالك ايه ؟
انا من عشاق السفر جدا وبالأخص بالليل وفي القطر
بحس أني حر أوي وانا مسافر وبشوف ناس جديدة وأدمغة مختلفة حلوة أدمغة دي.
المود بتاعي ايه ؟
السؤال مش واضح يعني مودي دلوقتي ولا عموماً
عامة دلوقتي حالا مودي اني نفسي انام عشان سهران من امبارح وهخبط راسي في الأسفلت :)
لكن عموما متقلب المزاج وبفرح بسرعه أوي ومش بزعل بسرعه الحمد لله من الناس
بتعمل ايه في وقت فراغك ؟
يا جماعة فراغ ايه انا بقولكوا مضيع 5000 جنيه عشان اقعد الشوية دول معاكوا قدروني بقي متنرفزنيش :)
عادي هعمل ايه يعني هقفل طيارات هليكوبتر !!!؟
زي اي حد
بقرأ
بقعد النت لحد ما يطلعلي ديل م القعده قدامه
بحب أصحابي أوي فغالبا بخرج معاهم كده يعني
الأكلة المفضلة ؟
بعشق حاجة أسمها محشي ورق عنب مع الفراخ مش اللحمة
الملوخية بتاعة والدتي ومحدش يقولي كل واحد بيقول كده
ماما قصة أخري في الموضوع ده
المسقعة من والدتي برضه
وفي اكله برضه بحبها لما اكون جعان وفي شغلي
الطعميه السخنة في فينو سخن مع شرائح الطماطم ( جامدة شرائح دي اوي ) مثقف بالفطرة.
الصفات الي أخذتها من والدك ؟
والله مش عارف اوي بس هخمن كده
ممكن العصبية لما بتعصب ببقي عايز اضرب بالنار عشان اهمد
الكرم والحمد لله
( بعض الغرور لا يفسد للود قضية )
بفرح بسرعة زي بابا
ويمكن في تاني
أكتر ست حاجات بتكرهم ؟
أسرائيل بأعتبارها حاجة مش دولة
الذنوب بتاعتي الي عارفها كويس
الأكتئاب
أخوانا البعدا الي بهدلوا ناس محترمة كتير
الخيانة سواء صديق او حبيب
الخبيزة مع اني عمري ما دوقتها ولا اتعملت في بيتنا والا كنت هاجرت بس اسمها لوحده يكرهها هي نفسها في نفسها
أكتر ست حاجات بتحبهم ؟
أنا أساسا ما بصدق أحب حاجات
مصر
ماما
أخواتي
أصدقائي
المدونين
شبرااااااا
شخصيتك نوعها ايه ؟
لا لا لا
ذكر طبعا احنا هنستهبل ولا ايه ,نوعها ازاي مش فاهم بجد
انا هجاوب وخلاص
يعني بيقولوا دمي خفيف وذكي ومش خبيث
لماذا دخلت عالم التدوين من الأساس ؟
السؤال حسسني انه بيقولي يعني ايه الي بلانا بيك :))
هقولكوا انا اول مره سمعت عن المونات كان من مدونة اسمها ربة السيف والقلم وهي حد محترم جدا زيكوا كده وكبرت في دماغي بقي من ساعتها.
أحلي جملة قيلت في وصف مدونتي ؟
تامر دياب الي بيعشق مصر
أهمية التعليقات بالنسبة ليا ؟
هو يعني بكتب عشان اراجع قبل الأمتحان
ما طبيعي تكون مهمة انا كاتب عشان اعرف الناس دي هتقول ايه في دماغي او عشان انشر موضوع معين الناس تقراه وتعلق عليه
وطبعا مدونة بدون تعليقات ملهاش قيمة عند صاحبها والا يكتب في اي كراسة قديمة عنده من ايام ابتدائي وخلاص.
احلى بوست كتبته؟ ضع اللينك ثم اذكر لماذا؟
عشان أنا كتبته وانا فعلا في حالة غير طبيعية ولا داعي لوصفها.
أفضل مدونة قرأتها ؟
ياااااااااه
كتير جدا وصعب اوي اقول علي مدونة معينة لاني هنسي كتير
حقيقي والله 90% من المدونات استفدت منها كتير اوي ومتعتني جدا
أفضل بوست قرأته ؟
كل السلسلة بتاعة
مذكرااااااااات ستيتة كلها جميلة وبجد مثال للزواج المحترم والحب الحقيقي وسمعني محمد فؤاد
الشغل بالنسبالك ايه ؟
والله الشغل عموما حاجة وشغلي انا دلوقتي حاجة
يعني دلوقتي بالنسبالي اكل عيش فقط الي ان اشتغل في الي بحبه ومصمم ان شاء الله اشتغل فيه حتي لو اقل من الي انا فيه وناس كتير بتقولي يا ابني مكانك ومش عارف ايه
انا معاكم اوك جدا
بس الي بحبه ده هيبقي فيه ابداع وابتكار لكن كده اسمه
اكل عييييييييش
الأنتر نت بالنسبالك ايه ؟
دنيا تانية غير الي انا عايش فيها اصلا
تمرر التاج ده لمين ؟
كل الي كنت عايز امررلهم التاج ده حد تاني مررهلهم
بس عامة كانوا هيبقوا كالآتي
فتافيت
سوتيتة
عاشقة وغلبانة بس مش ونبي
عمرو تشي
بحر الدموع وحبايب غزة كلهم
تامر مبروك
تامر علي
هيييييييييييييييييه التاج خلص وهرجع اجني الاموال بقي بلا عطلة
(وش رأسمالي شرير )
:p
مونكن تعزمني على مسقعة من بتاعة ماما ربنا يخليها
ردحذفومن هذا المنبر احب احيي شبرا وناس شبرا وسكان شبرا وخاصة اللي بيعملوا مسقعة
اجابات تعرفنا على تامر باشا
وشكرا لأن مذكراتي بتحبها لأنها الأحب الى قلبي
حكاية بتنجاني حكاية طويلة
يووووووووووووووووه
المسقعة مأثرة على عقلي
حكاية غرامي حكاية طويلة
تحياتي
جميل يا تمور
ردحذفاجابات جامدة
اجابات جميلة يا تامر
ردحذفواضح ان دمك خفيف
مش عارفة اية حكاية ورق العنب ماشى مع الكل
ردحذفالتاج دا شكلوا بيروح لكل اللى بيحب
محشى ورق العنب بس :)
سعيدة ان اول زيارة ليا لمدونتك
يكون البوست تاج عشان نتعرف عليك اكتر
تقبل مرورى
دى اول زيارة ليا
ردحذفبس سعيدة بتواجدى جدا
اجابات جامدة
جميلة جدا
تقبل مرورى
واتمنى الزيارة
انا فتافيت يا عم تيمو .. وكلمة السر اخر صبر المدونين عااااااااااااااااا
ردحذفبس انت عارف ان جوجل عامل الدنئية معايا ومش راضي يقبل دخولي
باين كده والله اعلم .. هايطردني وهاتشرد
اجابااااات عسسسسسسسسل .. ده طبعا لانى ما بحبش العسل زي مانت عارف هههههههههههههههههههههههههه
بس ليا ملحوظة .. ملوخية مامي ومسقعتها ومكرونتها اللي بالباشميل .. مافيش في مصر كلها زيها يا بابا
ام موضوع 5000 اللي ضاعوا دول.. تقريبا الصفر معلق معاك .. يا عم هات اللي عليك الاول عااااااااااااا
بوست جميل بجد وضحكت كتير
عسسسسسسسل :P
تامر بيك سيبه في حاله
ردحذفاخيرا
حمدلله على السلامه يابيه
كنت فين ده كله؟
أوعى تقولي مشغول والشغل, هع هع الكلام ده ياحبيبي تقوله لحد تاني
هههههههههه
لا بجد حمدلله على السلامه ياجميل
ايه ياعم؟ التاج حمض عندك
وايه حكاية الديل ده؟
هههههههه
بوست جمييييييييييييل واجابات زي الشربات
حاسب بس علشان في خمسين ألف مليون جنيه وقعوا من جيبك الصغير وانت قايم :)
ردحذفمركز خدمة رجال أعمال ده بيخدم رجال الأعمال ازاي يعني "خدمه في البيوت وكده يعني " طمني عليك بس :)
لاء بجد اجاباتك حلوة جداً بس كان ناقصها انك تقول انك بتحب الجبنة القريش بالزيت والطماطم والخيار والتحويجة ... علشان يبقى الناس كلها بتحب الجبنة ... مش تقوللي ورق عنب وفراخ .. بابا قالنا الفراخ دي انقرضت من زمان واللي موجود ده كله خدع سينيمائية حقيرة :)
يالا مش مهم اسيبك بقه علشان تجني أرباح طائلة :)
سلام
السلام عليكم
ردحذفايه الاجابات الحلوة هذه يا أستاذ تامر
مبدع الاجابة بأناقة الكتابة
ربنا يخليك ويبارك لك في وقتك
دمت بكل خير
لا تنسوا اخوانكم في غـزة من دعائكم
||..بحــر الدموع..||
ستيته حسب الله الحمش
ردحذفوالله لو هتوافقي ابقي عيل لو معملناش مسقعة وعزمتك :)
وطبعا مذكرات بتنجانك دي تحفه احنا هنلاقي زي بتنجانك فين بس.
منوراااااااااااني بكتييييير
حسام غانم
ردحذفشكرا يا باشا بس ابقي نورني دايما متبقاش مواسم كده بس
دكتور عرفة
ردحذففينك يا عم الحاج
مش تبقي تيجي كده تتطل عليا كل هبابة
هبابة احلي لفظ سمعته في حياتي
ربنا يخليك يا عم انا دمي خفيف
اخجلتم تواضعنا الي مش موجود انا عارف :)
أحساس طفلة محبة للرومانسية
ردحذفايه الأسم الجامد ده اصلا
لا بجد جميييييل
منوراني بأول زيارة دي ويارب تبقي علي طول موجودة مش بصه كده كل حين ومين
نفسي اعرف يعني ايه حين ومين !؟
بس متتكلميش علي ورق العنب تاني عشان منزعلش مع بعض
وش شرييييييير
الملاك الحزين
ردحذفاول زيارة برضه ونفسي تكرريها دايما
بس علي فكرة انا حاولت اجي ابص عندك بس ملف التعريف بتاعك غير متااااااح
فتافييييييييييييت
ردحذفزي انابيييييييييب كده
وش مطلع لســـــانـــــــة
منورة يا كااابيرة
جوجل عامل معاكي الدنيئة
حتي جوجل يا جدعان
يلا اهو يخلص الي بتعملي في البشر شوية ربنا كبير
ههههههههههههههههههههه
وبعدين كلمة الحق بتطلع الاول
اجابات عثثثثثل
مش قلتلك كل واحد بيقول علي اكل والدته هو الي هنا وهو الي هناك
صدقيني ده حكم عااام
ما علينا
ملكيش دعوة بفلوسي انا بقلك اهو لتصلطي عيل صغير عليا يفتشني ولا حاجة
( ايه عيل صغير دي ) اقصد بلطجي من منطقتكوا ولا حاجة.
أبو العيليه
ردحذفمعلش يا ابني انا كنت حاطط التاج في فورمالين عشان ميعفنش عندي ههههههههههه
وبعدين يا سيدي الديل ده كل الي بيقعدوا ع النت بطريقتنا دي هيحصلهم عاجلا أم عاجلاً برضه :)
منور شبرا يا باشمهندززز
د/أبويحيى وادم
ردحذفمع اني بتخنق من موضوع الي يدخل يسيب جملتين ويخرج بس هعديها عشان الجملتين بتوعك يثبتوا اجدعها مدون بس
منور يا باشا وهتابع المدونة ان شاء الله
تامر علي
ردحذفربنا يخليك يا حبيبي انت يا محافظ علي فلوسي ولمامهالي م السوق دايما كده
فكرني اديك تبس :)
مركز خدمة رجال اعمال يعني يا سيدي نغسلهم رجليهم مثلا نغسلهم غسيل نطبخ كده يعني
لا اطمن يا باشا خالث
وابجي تعالي صيف عندنا ومتغبش كده تاني احسنلك
بحر الدموع
ردحذفانت عارف بجد انا مقصر في حقك بس بالله عليك متزعل مني بجد
والله بفرح اوي لما اشوف تعليقك عندي :)
ربنا يخليك يا باشا وتفضل دايما مثال للتواصل كده
تامر دياب
ردحذفوالله انت دمك زى العسل
ماعرفش مدونتك كانت تايهه عنى فين
اجاباتك بسيطة وظريفة
ربنا يكرمك بالعمل الذى تحلم به
القدر وانتي
ردحذفحليوة الاسم بتاعة مدونتك ده :)
يا ستي الله يجبر بخاطرك انا عارف اني دمي عسل بس مبحبش اقول عشان الغرور بقي انتي عارفة والعجبين المرميين ع المدونات زي القهاوي كده.
مدونتي تتوه برضه
بقي الكنوز الي بكتبها دي تفوتك ( مش بقلك مبحبش اتكلم عن نفسي) لا ياريت متهش تاني منك بدل معمل حظر تجول علي دخولك هنا ( وش شرير )
وآمين بجد نفسي اشتغل في الي عايزة
انا جاوبت البتاع ده قبل كده يابني
ردحذفارحم روحك بقي
شوفلنا سندوتشين طعميه من اللي قولت عليهم دول
والله بقي لو عليهم شطه
ياااااااااه
والله جوعت
هههههههههههههههه
عاشقة وغلبانة
ردحذفمنا عارف انك جاوبتيه بس هرخم علي مين ؟
وموضوع الشطة ده سعادتك فلافور
زي ما تحبي
نا بحذر جميع الزملاء إن التيجان دي وسيلة لجمع المعلومات عننا لصالح حبايبنا الغاليين اللي إنتوا عارفينهم طبعا .. وأي حد يجيله تاج بعد كده يحرص جدا جدا وهو بيجاوب عشان المدونات ليها ودان .. هههه
ردحذفاجاباتك فى الجون يا عم تامر ... و يا رب ابطل كسل و اجاوب على التاج عشان منظرى اصبح صعب وسط المدونين .......0 بس وعد عليا انى لما اجاوب هاعرفك يا باشا
ردحذفيا مراكبي
ردحذفيا سيدي الفاضل
انت فاكر اخوانا البعدا الي الهي يولعوه مستنيين يعرفوا تامر بيحب ياكل محشي ولا لا
هما لو عايزين يعرفوا تامر مقاس جزمته كام هيعرفوا يا باشا ( ومشيها جزمته )
che
ردحذفعمووور
وحشني فحت يا ابني فينك من ايام انجلترا :)
جاوب بقي عشان شكلك وسط المدونين بقي مش نافع كده
(وش مطلع لسانة)
ايه ده يا تامر انت ومراكبي
ردحذفهو احنا متراقبين هنا ولا ايه؟؟
تحياااااا مصر وعاشة الحكومة
انا ولا اعرفكم
فتافيت
ردحذفايه البيع الوش ده !؟
دي اخرتها يا فتافيت ؟
تاخدينا عضم وترمينا عضم زي ما احنا كده
انا مليش دعوه يا حضرة الظابط هي دي صاحبة الحاجة كلها؟
بقي كده تقتل صاحبك يا ابو نسمة
الحلو في الصورة الاولى
ردحذفانه متمسك بتراثه
:)
اخس عليك
ردحذفكدة متجبش سيرتى خالص فى التاج
لما بتعصب ببقي عايز اضرب بالنار عشان اهمد
ردحذفهههههههههه جامده اوي الجمله دي بجد
بوست لذيذ والاجابات جامده ودمها خفيف بجد :)))
تحياتي لحضرتك :)
يفتح باب بيت المدونين ذراعيه لكل الموهبين في :
ردحذف1/ القصة القصيرة
2/ الشعر بشتى أنواعه
3/ الرواية “رواية سنوية سنقوم بنشرها في الجريدة”
4/ المقال الصحفي
إذا وجدت في نفسك القدرة على المشاركة أرجوا التواصل معي على الميل التالي
arabicsabah@yahoo.com
أرجوا إرسال مواضيعكم لأختيار الأفضل لنشره العدد القادم
أرجوا ارفاق الاعمال في ملف ورود
لمزيد من المعلومات بادروا بالاشتراك في الجروب الرسمي للجريدة
http://www.facebook.com/inbox/readmessage.php?t=1069922064069&f=1&e=-12#/group.php?gid=78080770039
لاول مرة اتشرف بزيارة مدونتك واردت فقط ان اسجل اعجابي الشديد بها تحياتي لك اخي الكريم
ردحذف