عماااااار يا أوكرانيا

يااااااااااااااه

لسه راجع من الشهر العقاري ... كنت بعمل توكيل ل3 محاميين عشان يقدموا تظلم لأخويا,بجد يا جماعة الموضوع ممتع أوي والموظفين هناك زي العسل لا والمبني بتاع الشهر العقاري ! الي فوق ده ميجيش مكتب بتاع الشاي هناك عموما أنا هسيبلكوا الصور تشرح المكان والي بيحصل فيه بالظبط .

أول صورة توضح بشاشة الموظف ومدي صحة قواه العقلية وأهم حاجة برضه الشياكة بتاعتة قاعد فورمال اوي وبيعامل الناس بمنتهي البشاشة والهشاشة والبغاشة الي في الدنيا

تاني حاجة هو مفيش حد عنده مشاكل!؟ الدنيا راااااااااااايئة بشكل غريب كده ليه ؟ بس عمالين يقولوا القضايا مالية المحاكم والدنيا مليانة مشاكل نفسي أعرف مين القلة المندسة الي بتقول كده !!! ما الناس زي الفل اهو ومفيش حد في الشهر العقاري غيري أنا والراجل الريتش الي موجود علي المكتب الي فوق ده

يا جدعان أنا كنت بغلي قصدي بغني من فرحتي

رايقة يا دنيا رايئة .... رايئة وتاهوا الحبايب ... مكنش ناقص غير اني اقف بالملابس الداخلية وارقص زي محمود عبد العزيز في فيلم الشقة من حق الزوجة من الفرحة

بس مش عارف الحبايب تاهوا ليه لما هي رايئة !!!

وعموما الصور هي الي بتقول مش أنا

هو أنا بألف يعني

( وآجي من هنا ... رااااايئة ... أروح هنا ... راااايئة ... هنا أو هنا ... راااايئة )

لا وكله كوووووووم وموضوع ان الموظفين بياخدوا فلوس دي كوم تاني ! مين الي قال كده بطلوا أفتري علي الخلق بقي الله يحرق الشعب المفتري ده بجاز ويريح الحكومة منه

كفاية هتك عرض الشرفاء النبلاء الأوفياء الاتقياء البلهاء... يا دي النيلة قصدي الأبرياء

الموظف هبوس رجلة كمان شوية عشان يشرب معايا شاي وانا قاعد مستني في الريسبشن المكيف طبعا وهو علي نغمة واحدة

ماخدوش يا تامر بيه... ماخدوش يا تامر باشا

لدرجة اني اول مره أحس ان ليا قيمة في البلد اوي كده !

اقله طيب اي حاجة مقابل المجهود الرهيب الي بتقوم بيه ده

يقولي عيب يا فندم ده عملي وواجبي الوطني

ربنا يكتر من امثالك يا بعيد

وبعدين أنا زعلان من الحكومة في حاجة

ليه مشغلين بنات بالجمال ده

يعني هو أحنا ناقصين

ومش لازم الموظفة تبتسم الأبتسامات الملائكية دي

أنا يا عم مسامح في دي لو معملتوهاش

أنا بسببكوا ولأول مره في حياتي أقع في حب من أول نظرة

مش هتتخيلوا اد ايه الشعور ده جميل

معقولة

دي تشتغل موظفة !

مش ممكن يا جدعان أنا هتجنن دي لازم تقعد في مملكة وحوليها وصيفات كده .. حاجة كده جايبة علي نيكول كيدمان -انجيلينا جولي

حاجة تفتح النفس وممكن تفتح الدماغ لو عايز كمان ,ده غير التركيز الغير طبيعي في العمل ... واحدة بتحب شغلها بجد ونفسها تحقق ذاتها علي راي القناة التالتة الي محدش بيشغلها خالص دي.

نفس البشاشة والهشاشة بتاعة الموظف كده

بس دي هشاشة عظام تقريبا

وياريت لو أحد المدونين من الجنس الآخر يكلمهالي لو مش مرتبطة بأي حاجة غير الكرسي الي قاعده عليه

(أو لو فيه حد من جنسها)

عشان انا وقعت ومحدش لا سمي ولا صلي ولا عمل اي حاجة عشاني

ومع أني مكنتش هحط الصورة عشان المدونين من الشباب الي لسه ما دخلوش دنيا

ولا هيدخلوا بعد ميشوفوها بس مش مشكلة انتوا اخواتي برضه

نيجي بقي لأهم نقطة في الدنيا

الوقت

أنا عايز اقلكوا اني خلصت التوكيل في 6 دقايق وربع هتقوله وعرفت منين الربع طبعا من الاستوب ووتش بتاعة مكتب الموظف

عندهم اهتمام بالوقت هناك بطريقة بشعة

ومفيش حاجة اسمها فوت علينا بكرة

ولا مشيان قبل ميعاد العمل بساعة الا ربع ولا هشرب سوجارة وارد عليك يا استاذ ولا متصدعنيش أنا نازلة من البيت قرفانة خلقة.

الجمل والهبل ده غير موجود لدينا .. مش عارف لدينا يعني مش عندنا ولا قصدهم بيها لا دينا.

وكل موظف قدامة ساعة ونتيجة ومشغل الساعة علي الاستوب ووتش والنتيجة غريبة اوي مش مكتوب فيها باليوم

لا ده بالنص يوم يعني مش عارف اقول ايه الصراحة

يارب ... بحق جاه النبي ... تفتحها في وشهم قادر يا كريم

أنا بشكر الساديين قصدي السادة المسؤولين علي حسن خدمتهم لينا وأخلاصهم في العمل واتقانهم في كيفية ايجاد جميع وسائل راحة المواطن